سپورٹ کشمیر انٹرنیشنل نیوز ـ نائب وزیراعظم اور وزیر خارجہ سینیٹر محمد اسحاق ڈار کی زیر صدارت اعلیٰ سطح کے اجلاس میں آزاد جموں و کشمیر اور گلگت بلتستان کے انتظامی، مالی اور ترقیاتی امور کا تفصیلی جائزہ لیا گیا۔
دفتر نائب وزیراعظم کی جانب سے جاری تفصیلات کے مطابق اجلاس میں وفاقی حکومت اور دونوں خطوں کی انتظامیہ کے درمیان موجودہ رابطوں اور گورننس سے متعلق اہم معاملات پر غور کیا گیا۔
ترقیاتی منصوبوں اور علاقائی رابطوں پر توجہ
اجلاس کے شرکا نے وفاق اور علاقائی حکومتوں کے درمیان ہم آہنگی کو مزید مؤثر بنانے کے لیے ادارہ جاتی میکانزم کا جائزہ لیا تاکہ انتظامی امور کو بہتر انداز میں چلایا جا سکے۔
اس موقع پر دونوں خطوں کے زیر التوا قانون سازی اور مالیاتی معاملات کو جلد از جلد نمٹانے پر بھی تفصیلی تبادلہ خیال کیا گیا۔
اجلاس میں سڑکوں کی تعمیر، بنیادی ڈھانچے (انفراسٹرکچر)، صحت کی سہولیات اور علاقائی روابط سمیت سماجی و معاشی ترقی کے منصوبوں کی رفتار تیز کرنے پر خصوصی زور دیا گیا۔
نئی حکومتوں کو عوامی ریلیف یقینی بنانے کی ہدایت
آزاد جموں کشمیر اور گلگت بلتستان کی تاریخی اہمیت اور وہاں کے عوام کی لازوال قربانیوں کو اجاگر کرتے ہوئے نائب وزیراعظم و وزیر خارجہ اسحاق ڈار نے کہا کہ دونوں خطوں کی ترقی وفاقی حکومت کی اولین ترجیح ہے۔
انہوں نے اس بات پر زور دیا کہ آزاد کشمیر اور گلگت بلتستان کی نئی تشکیل پانے والی حکومتوں کو گورننس کے چیلنجز سے مؤثر انداز میں نمٹنے اور عوامی خدمات کی فراہمی بہتر بنانے کے لیے نئے اور نتیجہ خیز اقدامات اٹھانے چاہییں۔
اسحاق ڈار نے تمام متعلقہ حکام کو ہدایت کی کہ وہ دونوں علاقائی حکومتوں کے ساتھ قریبی رابطہ رکھیں تاکہ جاری ترقیاتی منصوبوں کو بروقت مکمل کیا جا سکے اور عوام کو ٹھوس سماجی و معاشی ریلیف فراہم ہو۔
اجلاس میں وفاقی وزیر برائے امور کشمیر، گلگت بلتستان و سیفران امیر مقام، وزیراعظم کے معاون خصوصی طارق باجوہ، سیکریٹری امور کشمیر، گلگت بلتستان و سیفران سمیت متعلقہ وزارتوں کے اعلیٰ حکام نے شرکت کی۔
واضح رہے کہ آزاد جموں کشمیر اور گلگت بلتستان میں نئی حکومتوں کے قیام کے بعد وفاقی سطح پر یہ ایک اہم مشاورتی بیٹھک ہے، جس کا بنیادی مقصد وفاقی فنڈز کے بروقت اجرا اور عوامی فلاحی منصوبوں کی بلا تعطل تکمیل کو یقینی بنانا ہے۔
